“Zənnimcə, Ukraynanın heç, ümumiyyətlə, genişmiqyaslı əks-hücum planı yoxdur...”

“Düşmənin arxa cəbhəsində destablizasiya yaratmaq özü elə ən ciddi bir taktikadır. Və nəticə verəcək bir taktikadır...”

Aylardır ki, Ukraynanın genişmiqyaslı əks-hücumundan bəhs edilir. Amma bu, hələ də başlanmır. Bəs görəsən, buna mane olan əsas amillər hansılardır?..

Moderator.az-a açıqlamasında siyasi təhlükəsizlik məsələləri üzrə ekspert  Ərəstun Oruclu bunları söyləyib.

“Ukraynanın genişmiqyaslı əks-hücuma başlamamasının səbəblərinə gəldikdə, birincisi,  mənə elə gəlir ki, heç, ümumiyyətlə, Ukrayna hərbi-siyasi komandanlığının belə bir hücum planı yoxdur. Ona görə ki, əks-hücuma keçmək  faktiki olaraq müharibənin miqyasını böyütməkdir. Və indiki resurslarla Ukraynaya bu lazım deyil. Çünki biz görürük ki, Ukraynanın silahlandırılması mərhələli şəkildə gedir: əvvəlcə bir növ silahları verirlər, sonra tanklar, daha sonra raketlər, ardınca təyyarələr... Və genişmiqyaslı əks-hücum yalnız o zaman mümkündür ki, bax, bütün bu silah növləriylə Ukrayna ordusu tam təchiz olunsun. Həmin silahların idarə olunması təlimlər keçirilsin və onların nətisəsi ortaya qoyulsun, bundan sonra da bir əks-hücum, döyüş planı hazırlansın. Amma bunun əlamətləri görünmür. Görünən odur ki, mərhələli şəkildə Ukraynaya silahlar verilir və bu silahların verilməsi də hər dəfə Rusiya ordusu və dövləti üçün müəyyən sürprizlər yaradır”. 

Analitik hesab edir ki, Ukrayna işğalçı ordunu məğlub etmək üçün daha çox üzücü bir müharibə taktikasına üstünlük verir.

“Mənə elə gəlir ki, Ukrayna Rusiyaya qarşı daha çox üzücü bir müharibə taktikası həyata keçirir. Genişmiqyaslı əks-hücum haqda söhbətlər isə bu, çox güman ki, ya dezinformasiyadır, ya da növbəti mərhələ üçün nəzərdə tutulub. Təkrar edirəm ki, əks-hücum üçün Ukrayna bunun üçün zəruri olan bütün silah növləri ilə tam təchiz olunmalı və həmin silahları düzgün idarə etmək üçün müvafiq təlimlər keçirilməlidir. Bu isə mərhələli şəkildə baş verir. Çox güman ki, belə bir əks-hücum kampaniyası gələcəkdə ola bilər. Amma dediyim kimi, heç olmaya da bilər. Çünki faktiki olaraq bu gün müharibə Rusiyanın ərazisinə keçməkdədir. Belə olduğu halda hansısa əks-hücuma ehtiyac varmı? Zənnimcə, yox... Düşmənin arxa cəbhəsində destablizasiya yaratmaq özü elə ən ciddi bir taktikadır. Və nəticə verəcək bir taktikadır. Xülasə, Ukraynanın genişmiqyaslı əks-hücuma başlamamasına səbəb kimi mən bunları görürəm"- deyə ekspert vurğulayıb.