Misirin prezidenti Türkiyəyə gəlir - 12 il sonra
Misir prezidenti Əbdülfəttah əs-Sisi həmkarı Rəcəb Tayyib Ərdoğanın dəvəti ilə bu gün Türkiyəyə gəlir.
Ankarada Yüksək Səviyyəli Strateji Əməkdaşlıq Şurasının ilk iclası keçiriləcək.
Bununla Ankara 12 ildən sonra Misirdən prezidenti gəlmiş olur. Ərdoğan həmkarını Beştəpədə rəsmi mərasimlə qarşılayacaq. Prezidentlər Türkiyə-Misir Yüksək Səviyyəli Strateji Əməkdaşlıq Şurasının iclasına sədrlik edəcəklər.
İki ölkə arasında 10 milyard dollara çatan ticarət həcmində yeni hədəf 15 milyard dollardır. İclasda bu məqsədə çatmaq üçün atılacaq addımlar dəyərləndiriləcək. Enerji, səhiyyə, turizm və müdafiə sənayesi sahələrində uzunmüddətli əməkdaşlıq imkanları müzakirə olunacaq.
Qəzza məsələsi və bölgəyə edilən humanitar yardımlar da səfərin əsas gündəm mövzularındandır. Ərdoğan və Sisi ən qısa zamanda atəşkəsin təmin edilməsi üçün atılacaq birgə addımları qiymətləndirəcək. Regional məsələlərdə daimi sabitlik, sülh və əmin-amanlığın bərqərar olması üçün nələrin edilə biləcəyi müzakirə ediləcək.
