"Paşinyan xəyanətkar deyil" - PUTİN
Rusiya Prezidenti Vladimir Putin Ermənistanın baş naziri Nikol Paşinyana qarşı xəyanət ittihamlarının əsası olmadığını bildirib.
Azsiyasət.com xəbər verir ki, o bu barədə "Rossiya 24" kanalının efirində bəyan edib.
"Ona (Paşinyana-red.) qarşı hansısa xəyanət haqqında ittihamların əsası yoxdur", - deyə V.Putin qeyd edib.
Rusiya Prezidenti məlum bəyanatdan sonra Yerevanda baş verənlərlə bağlı bildirib ki, Ermənistandakı güc strukturları cəmiyyəti içəridən parçalamaq imkanında deyillər.
Putinin sözlərinə görə, müharibə edən və ya yenidən başlaya biləcək döyüş əməliyyatları təhlükəsi ilə üzləşən ölkə özünü belə aparmamalıdır. O cümlədən cəmiyyəti içəridən parçalamaq üçün hakimiyyətin təşkili sahəsində də. Onun fikrincə, bu, qəbuledilməz, əks təsirli və son dərəcə təhlükəlidir.
Ermənistandakı daxili siyasi vəziyyətə, hakimiyyətə qarşı mitinq və istefa tələblərinə, eyni zamanda müxalifət liderlərinin həbsinə gəlincə, Putin bildirib ki, bu, onların işi deyil: “Ermənistanın daxili siyasətində nə baş verir, bizim işimiz deyil. Bu müstəqil, suveren ölkədir, nəyi lazım bilirsə, daxili siyasətdə onu da etmək haqqına sahibdir”.
V.Putin onu da vurğulayıb ki, Qarabağ ətrafında baş verən situasiyada Rusiyanın öhdəliklərini yerinə yetirməsinə görə Ermənistan rəhbərliyi dəfələrlə ona təşəkkür edib: “Rusiya çoxtərəfli və ikitərəfli çərçivədə, o cümlədən hərbi-texniki sahədə əməkdaşlıqda öz öhdəliklərini tam şəkildə yerinə yetirib. Buna görə Ermənistan rəhbərliyi, baş nazir Paşinyan dəfələrlə Rusiyaya təşəkkür edib”.
