Bu ölkələrin səfirləri Türkiyə XİN-ə ÇAĞRILDI
Avropa İttifaqı (Aİ) və İtaliyanın Ankaradakı səfirləri, Almaniyanın müvəqqəti işlər vəkili Türkiyə Xarici İşlər Nazirliyinə çağrılıb.
Azsiyasət.com “Anadolu Agentliyi”nə istinadən xəbər verir ki, bu barədə Türkiyə XİN-nin açıqlamasında bildirilib. Qeyd edilib ki, Avropa İttifaqının, İtaliyanın Ankaradakı səfiri və Almaniyanın Ankaradakı müvəqqəti işlər vəkili Türkiyə XİN-nin müavini Sedat Önal tərəfindən XİN-ə çağırılıb.
Açıqlamada bildirilib: "Türkiyənin açıq icazəsi olmadan bizə məxsus “Roseline-A” gəmisində “İrini əməliyyatı” çərçivəsində axtarışın aparılması ilə bağlı həmin ölkələrə etiraz edildi və nota verildi. Notada axtarışın beynəlxalq hüquqlara zidd olduğu və təzminat hüquqlarımızın qüvvədə olacağı bildirildi".
Xatırladaq ki, kapitanı yunan olan Almaniyaya məxsus “Hamburq” gəmisinin hərbi heyəti beynəlxalq dəniz qanunlarına zidd olaraq Aralıq dənizi vasitəsilə Liviyaya ərzaq, boya və bu kimi məhsullar aparan Türkiyəyə məxsus ticarət gəmisində axtarış aparıb.
