"Seçki olsa, qan töküləcək" - Erməni müxalifəti
Ermənistanın baş naziri Nikol Paşinyan dekabrın 25-də bildirmişdi ki, o, növbədənkənar seçki keçirməyə, xalq ona etimad göstərməsə, hətta postundan getməyə hazırdır. O, müxalifəti bu məsələ ətrafında məsələhətləşmələr keçirməyə dəvət etmişdi.
Müxalifətin baş nazir postuna namizəd elan etdiyi Vazgen Manukyan Ermənistan ictimai telekanalına müsahibəsində deyib ki, Nikol Paşinyan baş nazir postunda qala-qala heç bir seçki keçirilə bilməz. “Vətənin xilası” hərəkatının lideri Manukyan bildirib ki, indiki şəraitdə seçki keçirilməsi ölkəni daha da parçalaya bilər: “İndiki vaxtda və yaxud bir aydan, iki aydan sonra seçki Ermənistanın parçalanması deməkdir. Çünki seçki mübarizə deməkdir, bütün partiyalar bir-biri ilə mübarizəyə başlayacaqlar. Bu situasiyada bu prosesə girməyə dəyərmi? Biz özümüzə gəlmədən bunu etmək olmaz”.
Paşinyan növbədənkənar seçkidən danışarkən dəqiq vaxt göstərməyib. Hazırkı konstitusiyaya görə parlament seçkisi baş nazir istefaya getdikdə və Milli Məclis iki dəfə yeni baş naziri təyin edə bilməyəndə keçirilməlidir. İndilik bu yeganə mexanizmdir.
Lakin Paşinyan daha bir yol təklif edir: Konstitusiyanı dəyişmək və seçkini baş nazir istefaya getmədən keçirmək. Lakin müxalifət bu təklifin əleyhinədir. Vazgen Manukyan deyib ki, o bu variantı heç nəzərdən keçirmək də istəmir: “O növbədənkənar seçkiyə qədər çıxıb getməlidir. Mən bu variantı heç müzakirə də etmək istəmirəm. O baş nazir kimi qalsa, Ermənistanda heç bir seçki olmayacaq. Əgər seçki olsa hər seçki qutusunun yanında dava-dala düşəcək, qan töküləcək”.
Müxalifətdən olan başqa partiyalar da Paşinyan istefaya getmədən keçiriləcək seçkinin əleyhinədirlər.
Maariflənmiş Ermənistan partiyasının fraksiya rəhbəri, bu partiyanın baş nazirliyə namizədi Edmon Marukyandır. Bu partiyadan olan deputat Taron Simonyan Paşinyanla hər hansı danışıqlara qarşıdır: “Biz hansı müzakirədə iştirak etsək də, o öz hakimiyyətini qoruyub saxlamaq istəyəcək. Yəni bu kreslo bu qədər əzizdir ki, adamlar ondan belə yapışırlar? Bu parlament ölkəsidir. Xalq parlament seçib. Bu sistemdə lap 10 baş nazir dəyişə bilər. İstəyirsiniz hər iki aydan bir baş nazir seçin. Bəli seçki olmalıdır. Amma bu seçki normal atmosferdə keçirilməlidir”.
Erməni mətbuatı yazır ki, müxalifətin bu tələblərinə hakim “Mənim addımım” fraksiyasının rəhbəri Lilit Makunts cavab verib. O seçki qutularının yanında qan töküləcəyi ilə bağlı iddiaya belə münasibət bildirib: “Bu nədir, eyham, yoxsa hədə? Bu əslində, o deməkdir ki, Ermənistanda hakimiyyətin Ermənistan vətəndaşına məxsus olması reallığını qəbul etməyən, onunla barışmayan adamlar var”.
Onun sözlərinə görə, müxalifət var gücü ilə inandırmağa və hətta hədələməyə çalışır ki, azad seçki yaxşı fikir deyil. Lilit Makunts deyib ki, müxalifət öz gücünü həddən artıq şişirdir, dövlət və hüquq-mühafizə sistemlərini isə lazımınca qiymətləndirmir. Bundan əvvəl Nikol Paşinyan da müxalifətin xalq tərəfindən dəstəklənmədiyini demişdi.
azpolitika.info
