Gürcüstanda voleybol üzrə milli komandalar arasında Ulu Öndər Heydər Əliyevə həsr olunan yoldaşlıq oyunu keçirilmişdir - FOTOLAR

Azərbaycan Respublikasının Gürcüstandakı Səfirliyi tərəfindən Ulu Öndər Heydər Əliyevin anadan olmasının 98-ci öldönümü ilə bağlı keçirilən silsilə tədbirlər çərçivəsində cari ilin 11 may tarixində paytaxt Tbilisi şəhərinə yerləşən “Yeni Voleybol Arenası”nda Azərbaycan ilə Gürcüstanın volleybol üzrə kişilərdən ibarət milli komandalarının yoldaşlıq oyunu təşkil edilmişdir.

Milli komandaların oyununu Azərbaycanın Gürcüstandakı Fövqəladə və Səlahiyyətli Səfiri Faiq Quliyev, səfirlik əməkdaşları, eyni zamanda Gürcüstanın Voleybol Federasiyasının prezidenti İrakliy Çuçua və Azərbaycan Voleybol Federasiyasının vitse-prezidenti Abulfəs Hüseynov  izləmişlər.

Dostluq və yoldaşlıq ruhunda keçən qarşılaşmada 3:0 hesabı ilə Azərbaycan milli komandası qalib gəlmişdir.

Milli komandaların yoldaşlıq oyunundan sonra Səfir Faiq Quliyev və Gürcüstanın Voleybol Federasiyasının prezidenti İrakliy Çuçua tərəfindən hər iki yığmanın kapitanlarına Heydər Əliyev kuboku təqdim edilmişdir. Bundan başqa yoldaşlıq oyununu izləyən rəsmi şəxslər tərəfindən həm Azərbaycan, həmdəki Gürcüstan idmançılarına sertifikatlar təqdim olunmuşdur.

Təltifetmə mərasimində çıxış edən Səfir Faiq Quliyev hər iki milli komandaya Səfirliyin təklifini qəbul edib Ulu Öndər Heydər Əliyevə həsr olunan yoldaşlıq oyununda iştirak etdikləri üçün minnətdarlığını bildirmişdir.

Daha sonra çıxış edən federasiyaların rəsmiləri Ulu Öndər Heydər Əliyevə həsr olunan yoldaşlıq oyunun timsalında iki qonşu dövlətin müxtəlif idman növləri üzrə komandalarının qarşılaşmalarının daha sıx keçirilməsinin vacibliyini qeyd etmişlər.

Sonda rəsmi şəxslər və idmançılar kollektiv xatirə şəkili çəkdirmişlər.