İsrail Suriyanın hərbi zavodlarına hücum edib - "Əl-Hadath" telekanalı

İsrail hərbi-hava qüvvələrinin (HHQ) təyyarələri iyulun 20-si gecə Suriyanın Hələb şəhərinin cənub-şərqində (Dəməşqin 360 kilometrliyində) yerləşən Əs-Səfria rayonundakı hərbi müəssisələrə hücum ediblər.

Bu barədə Dubaydan yayımlanan ərəb «Əl-Hadath» telekanalı xəbər verib.

Telekanalın məlumatına görə, zərbələr həm də iranyönlü şiə birləşmələrinə məxsus silah anbarlarına endirilib. Onlar Suriya ordusu tərəfindən vuruşurlar. Xəbərdə qeyd olunur ki, şiə dəstələri itki veriblər, digər təfərrüatlar barədə danışılmır.

Livanın «Əl-Mayadeen» telekanalı öz növbəsində xəbər verib ki, hücum Hələb ətrafındakı elmi-tədqiqat mərkəzinə endirilib. Bundan əvvəl SANA agentliyi hərbi mənbələrə istinadla xəbər verib ki, Suriyanın hava-hücumundan müdafiə (HHM) qüvvələri İsrail HHQ-nin Hələbin cənub-şərqindəki hücumunun qarşısını alıb. Onun məlumatına görə, həcum Bakı vaxtı ilə saat 00:37 dəqiqəyə təsadüf edib.

«Suriyanın HHM vasitələri düşmənin hava hədəflərinin çoxunu məhv edib, nəticədə İsrailin təcavüzkar hücumu Əs-Səfira rayonunda bəzi obyektlərə ziyan vurub» - agentlik xəbər verib.