İranın yeni prezidentinin komandasında kimlər var?
“İranın yeni Prezidenti İbrahim Rəisi özü kabinetini də özü kimi mühafizəkarlardan formalaşdırıb”.
Azsiyaset.com xəbər verir ki, bunu politoloq Elxan Şahinoğlu deyib.
Ekspert prezident seçkilərindən sonra İran daxilində baş verən siyasi dəyişikliyə diqqət çəkib:
“İran prezidenti İbrahim Rəisi bu gün parlamentə nazirlər kabinetinin siyahısını məktubla göndərib. Parlament nazirləri avqustun 22-dəki iclasında müzakirə edəcək. İbrahim Rəisi əsas postlara İslam Keşikçiləri Korpusuyla sıx bağlı və anti-Qərb meylli namizədləri irəli sürüb. Misal üçün, xarici işlər naziri vəzifəsinə irəli sürülən Hüseyn Əmir Abdullahiyan SEPAH-ın “Qüds” briqadasına yaxın şəxsdir. O, Qərbə və İsrailə nifrət edən açıqlamaları ilə yadda qalıb. “İsraili hər an dağıdıb, onun şəhərlərini viran qoya bilərik”, deyən yeni nazir ali dini lider Əli Xameneyi və “Hizbullah”ın lideri Həsən Nəsrullahla yaxınlığı ilə tanınır. Rəisinin daxili işlər naziri postuna irəli sürdüyü Əhməd Vəhidi də beynəlxalq aləmdə böyük rezonans doğurub. Əhməd Vəhidi 1994-cü ildə SEPAH və ETTELAAT-a bağlı qüvvələrin Argentinanın paytaxtında yəhudilərə məxsus “Amya” mərkəzində törətdiyi terror aktında iştirakda şübhəli bilinir. Həmin partlayış zamanı 80-dən çox insan həlak olmuşdu. O 2007-ci ildən İnterpolun axtarış siyahısındadır”.
Elxan Şahinoğlu qeyd edib ki, İbrahim Rəisi kabineti də özü kimi mühafizəkarlardan formalaşdırıb:
“Parlamentdə mühafizəkarların çoxluqda olduğunu nəzərə alaraq nazirlərin təsdiq olunacağı şübhə doğurmur. Yeni nazirlərin qarşısında titanik problemlər var. Birincisi, İranda pandemiya tüğyan edir, virusa yoluxma və ölüm halları azalmır, vaksin çatışmır. İkincisi, pandemiya və sanksiyalar iqtisadiyyatı çökərdib, sosial problemlər artıb. Üçüncüsü, Tehranın Vaşinqtonla “nüvə anlaşması” danışıqları dalana dirənib. Dördüncüsü, İran İsraillə müharibə astanasındadır. Beşincisi, Tehranın ərəb dünyasının bir hissəsiylə də münasibətləri gərgindir. Bu problemləri islahatçı adlanan keçmiş prezident Həsən Ruhani və komandası həll edə bilmədi. Mühafizəkarlrın şansı nə qədərdir – bunu zaman göstərəcək”.
