Ermənistanda Rusiya casusları haqqında materialları yoxlamağa başlayıblar

Ermənistan Milli Təhlükəsizlik Xidmətinin rəhbəri Arqişti Kyaramyan Ermənistandakı Rusiya casusları haqqında məlumatı yoxlamağa başladıqlarını bildirib, bu barədə “Aravot” nəşri yazıb.

Buna Rusiyanın müxalif oliqarxı Mixail Xodorovskinin layihəsi olan “Dosye” Analitika Mərkəzinin məqaləsi səbəb olub.

Məqaləyə əsasən, Ermənistanda “Rusiya dostları” şəbəkəsi var, onlar “demək olar ki, bütün dövlət orqanlarında – hökumətdə, parlamentdə, xüsusi xidmətlərdə, XİN-də möhkəmləniblər”.

Rusiyanın maraqlarına xidmət edənlər siyahısında MTX-nin keçmiş rəhbəri Artur Vanetsyan və milyarder Qaqik Tsarukyan da daxil olmaqla, bir çox siyasi xadimlərin adları çəkilir.

“Bu məqalə öz-özlüyündə cinayət haqqında məlumatdır. MTX hüquq-mühafizə orqanı olaraq, təbii ki, bu məqalədə əksini tapmış istənilən fakta hüquqi qiymət verəcək”, deyə Kyaramyan jurnalistlərə bildirib.

Qeyd edək ki, həmin məqalədə Rusiya xüsusi xidmətləri üçün maraq kəsb edə biləcək bir qrup Azərbaycan vətəndaşından da bəhs edilirdi.