“Əks-hücum daha çox vaxt tələb edir...” – Ukraynanın yaxın üç aya aid planları məlum olub

“24 fevraldan etibarən iki dəfə hərbi vəziyyətin müddətini uzatmışıq. İndi biz başa düşürük ki, düşmən diqqətini müvəqqəti işğal etdiyi ərazilərdə istehkamlar inşa etməyə yönəldib. Əks-hücum müdafiədən daha çətin əməliyyatdır. Ona görə anlamalıyıq ki, biz bütün Ukraynanın ərazisini yaxın bir ay ərzində azad etməyi çətin ki, bacaraq”.

Bunu Ukrayna Prezidentinin Konstitusiya Məhkəməsindəki nümayəndəsi Fyodr Venislavskiy yerli mətbuata açıqlamasında söyləyib.

Prezidentin təmsilçisi bununla da Volodimir Zelenskinin ölkədə hərbi vəziyyətin əvvəl olduğu kimi bir ay deyil, birdən-birə üç ay müddətinə uzadılması təklifinin məqsədini açıqlayıb. Venislavski əlavə edib ki, Ukrayna parlamenti istənilən vaxt hərbi vəziyyəti ləğv etmək səlahiyyətinə malikdir və Ukrayna Ordusu işğal olunmuş əraziləri 3 aydan tez müddətə azad edə bilsə, Ali Rada ölkədəki hərbi vəziyyəti aradan qaldıra bilər. Bu halda hərbi vəziyyət üç ay deyil, daha qısa müddətdə qüvvədə qalacaq.

Zelenskinin sözçüsünün dediklərindən belə çıxır ki, Ukrayna ən azı yaxın üç ay ərzində əks-hücum əməliyyatı həyata keçirməyi və mümkün qədər savaşı həmin müddətdə bitirərək, işğalçı qüvvələri ölkə ərazilərindən çıxarmağı planlaşdırır.Azpolitika.info